離島親子遊 - 南丫島漁民文化體驗日

1點鐘上船後，大約20分鐘就去到索罟灣碼頭。

落左船直行就會到索罟灣第一街搵野食醫肚。

係第一街入面除左有大家耳熟能詳嘅海鮮酒家之外，

其實仲有好多唔同嘅選擇，比如泰菜，西餐都係大約7~80蚊左右。

建議搵個近欄邊嘅位可以睇下景，食都食得開心啲。

文化村內每逢撘正都會有導賞員帶遊客遊園一圈，記得計好時間去索罟灣碼頭傍邊有個大大隻字「南丫島漁民文化村」嘅售票處買入場卷，唔好錯過。

你亦都可以先喺佢地嘅官網 網上買定飛，安心玩 。

「南丫島漁民文化村」是一個全新意念的旅遊景點，建於南丫島索罟灣養魚區，面積約二千平方米的漁排上，介紹香港原居漁民傳統文化和捕魚業發展歷程。

文化村分為展覽、遊戲、飲食、購物四大元素，文化村內每逢撘正都會有導賞員帶遊客遊園一圈，由行入古漁船了解水上人舊時嘅生活模式，到從魚池認識本港常見魚類及養殖方法。導賞員用佢地嘅豐富經驗及幽默感教授喺展版以外知識，保證令你獲益良多。

門票會包你$20嘅遊戲代用卷，可以選擇玩無鈎釣魚($20代用卷)，好需要你眼明手快，你將會有一條木，繩，綁住一條魚做餌。

放左餌落水之後，睇準條魚咬餌嘅一刻就將佢抽上黎。

上左水嘅話條魚就歸你，你可以選擇放生又或者交由職員幫你處理再帶走。

唔想咁麻煩嘅都可以揀用 $10 買桶魚去餵魚，絕對可以令參觀者可以玩得開心又學到野。

成人標準門票 General Ticket : $80

小童或長者標準門票 General Ticket for Child/Senior: $60

其他門票種類換活動收費可參考：門票官方網頁

由漁排返黎地之後向榕樹灣方向行，會先經過天后宮，依座天后宮有150年嘅歷史，就如同其他沿岸嘅漁民一樣，佢地出海之先都會向天后祈求平安同豐收。

行過左索罟灣牌後，你就正式踏上南丫島家樂徑，沿路拾級而上，你會見到啲景點，就好似係 神風洞，觀景亭，行到最高點嘅時候更可以遠眺南丫島發電廠及海灣景色。

沿途休息位都多，亦有士多可以補給，整體黎講都算輕鬆。

去到尾段如果仲有力的話就可以選擇行上去睇風采風力發電風車，如果體力到頂就可以落返去洪聖爺沙灘坐下，睇下人玩水。

到咁上下就會可以去榕樹灣大街食下午茶或者晚餐。

行出左洪聖爺灣之後就係橫塱村，亦都係周潤發先生嘅出生之地，周圍都有唔同嘅展版去簡述依位影視紅星係南丫島嘅事蹟。

經過阿婆豆腐花之後，就正式行入榕樹灣大街。

可以係大街入面見到好好嘅中西融合，不分國籍膚色嘅人都會係酒吧傾計，既有中式小菜，泰式熱炒，更有意大利薄餅。

另外亦都留意到島上特別多素食餐廳，可能係同島上崇尚自然簡樸嘅民風有關，比較特別嘅可以考慮下「書蟲Cafe」，佢地嘅milk shake 可以一試。

肚仔餓嘅就可以食埋飯先走，如果唔係嘅都可以出返市區先食。