荃灣區 - 老闆娘食米線行紗廠

鄰近荃灣福來村旁的荃灣香車街熟食中心，有間深受街坊歡迎嘅老闆娘雲南米線，長期都人山人海。麵底除左米線之外，仲可選擇米通、拉麵、烏冬，而且配料超過三十種，當中唔少更加係罕見選項，例如魚肉響鈴、豆腐魚丸、豆瓣金錢肚、野菌腐皮卷等等，每件都炸得香脆足料，大件夾抵食。店員仲會好細心咁將炸嘅配料同湯麵分開上，唔會比湯浸到淋哂。

雲南米線每碗$45包一樣配料，加配料就$10一款，有清湯，酸，麻辣湯底。另外出街推介蟲草花薑酒湯米線($56)，可以配雞肉/牛/豬潤。呢碗正野充滿住蟲草花、紅棗、 芽菜，仲有好多肉，湯底非常濃味，酒味十足，冬天食可以暖胃，絕對係補品之選！每碗米線份量十足，好味，大大碗。飲品方面可以係入座前係雪櫃選擇，有汽水、烏龍茶等飲品。

由於每碗米線都係由老闆親自煮，所以請體諒小店等候時間長。由於營業時間不穩定，出發之前，可以先睇下佢地個Facebook睇最新嘅營業時間，咁就唔洗摸門釘啦。

食飽米線後，接住可以參加下午2:30嘅南豐紗廠導賞團。可以喺行舖頭之前，先了解紗廠活化過程和未來發展，每節大約45分鐘。

*出發前先到以下連結睇下有無位或即場報名都得，導賞團只係星期六，日舉行，費用全免，先到先得。

南豐紗廠導賞團：http://www.themills.com.hk/themillstour

南豐紗廠總面積有26萬平方呎，咁大嘅地方當然有唔少嘅發展可能，以下係總括紗廠嘅特色和景點，總有一樣啱你同身邊嘅人慢慢行和發掘。

南豐紗廠The Mills前身係紡織工廠，2018年完成活化後，成為荃灣區地標之一。 紗廠分為三大支柱 ： 南豐作坊，南豐店堂和六廠紡織文化藝術館。

• 南豐作坊 (四廠) 係一個培育基地，屬於創業家嘅工作空間。當中有一間 Techstyle X 體驗店，向公眾展示科技產品和技術，新概念，追求潮流嘅你可以去睇下。

• 南豐店堂 (五廠) 係包括本地和其他國家在香港設立品牌嘅零售店區，例如台灣，新加坡，泰國等，有大大小小嘅零售店售賣天然日用品、護膚品，手工肥皂，香薰精油、手飾等產品，讓每個走進南豐店堂嘅人能體驗綠色生活概念和獨特生活風格。

• 六廠紡織文化藝術館 (六廠) 就展出紡織藝術展品，機械和照片，令到訪嘅人知道香港紡織業歷史。六廠設有虛擬實境體驗 ，玩家可以體驗自己坐係紡紗機入面，透過操控機器，體感上探索紡紗業嘅故事。藝術館定期會有新作品展示，有些展覽要購買門票先可以進入。

         詳情：https://www.mill6chat.org

• 小朋友最愛： The Big Things 係芬蘭式嘅大自然主題兒童遊樂場，適合同小朋友跑跑跳跳玩樂嘅地方。

1小時費用: $140 （星期一至五）；$190 （星期六、日及公眾假期）

入場人數： 1個大人+ 1個小朋友

購買門票：https://www.thebigthings.com/en-us/home

• 打卡影相：進入紗廠正門前會經過外牆壁畫 ，由本地藝術家設計嘅一系列壁畫，最啱打卡放上Instagram 呃like。除此之外，仲有好多位可以打卡，等你自行發掘吧。

• 舉辦不同活動：每個星期六下午紗廠都會舉辦活動，例如工作坊、分享會、皮影戲等。

詳情：https://www.themills.com.hk/artymoment/

• 特別日子：每個月嘅最後一日，如係紗廠指定餐廳食野時自備容器，可以享有優惠

詳情：http://www.themills.com.hk/event/重塑綠色生活/

南豐紗廠提供免費接駁紅VAN來回荃灣地鐵站和南豐紗廠。紗廠上客區位於地下停車場﹐落客區係荃灣政府合署對面 （荃灣站A4出口）。免費接駁紅VAN車身有南豐紗廠嘅字樣和標誌, 讓你這趟行程作完結。

逄星期六，日或公眾假期：每10分鐘一班

逄星期一至五：每20分鐘一班