西貢 - 龍蝦灣郊遊徑

前往龍蝦灣可以選擇搭車到「大坳門」落車

1) 鑽石山巴士總站 乘坐91號巴士

2)將軍澳站乘坐103M 或 16 號小巴

落車後向前行10分鐘到達清水灣郊野公園，清水灣郊野公園設備完善，有樹木研習徑、燒烤場、小食亭和廁所等等，吸引唔少人專程去野餐、露營以及放風箏嘅郊遊聖地。

郊遊徑起點位於停車場旁，第一個Check Point就係路線最難部分 - 行樓梯直衝上最高點！

呢條天梯斜度比較大，加上出街當日溫度同濕度都高，所以行起來比較吃力。咬緊牙關行三十分鐘後到達山頂大嶺峒，可以望琴牛尾洲、相思灣、吊鐘洲、火石洲等地方。

係山項休息過後，之後就係就係平緩嘅山徑，一路沿住海灣行，景色雖然怡人但同時沒有樹陰，會比較曬。

如果你對玩獨木舟、浮潛等水上活動有興趣，你都可以喺途中選擇往綠蛋島方向行，享受上山下海假期。但要留意往綠蛋島嘅路比較崎嶇，要衡量過先出發啊！

TripGuide當日就選擇只完成龍蝦灣郊遊徑，落山路徑以沙石樓梯為主，記得慢慢行。直至望到騎術學校，就表示差唔多到山腳了。到達山腳後，要沿車路行35分鐘回到落車嘅地點，才有巴士/小巴搭車離開。

1.  龍蝦灣算係一條簡單易行嘅路線，假日人流唔多，有無敵大海景

2.  如果揸車人士就可以選擇泊車係大坳門燒烤場或騎術學校門口，可帶同小狗或小朋友上山欣賞景色

3.  到達山腳後，可以選擇Call的士離開，因為沿馬路行去大坳門迴旋處要35分鐘，沿途只會經過村落，無咩野睇

4.  騎術學校旁邊亦有個放風箏地點，其實香港放風箏嘅地點唔多，可以帶D紙鳶去玩下都唔錯

5.  如沿車路回大坳門迴旋處，會有一間士多比你補充能量，例如寶礦力、沙嗲牛肉麵等