大埔 - 簡易行山大埔滘林徑藍路
- 來回時間約2小時
- 獨樂樂/親子活動/情侶
- 免費入場
- 大埔區大埔滘大埔公路 - 大埔滘段近大埔滘花園
關於
最近好多香港人開始走入山林，感受大自然，TripGuide今日就同大家介紹一條簡易行山路段 - 大埔滘林徑(藍路)，唔洗劈山爆林，適合想漫步深山，放鬆心情嘅朋友。
大埔滘林徑位於大埔公路，林徑設紅路（3公里 / 45分鐘）、藍路（4公里/ 1.2小時）、啡路（7公里/2.5小時）同黃路（10公里/3.5小時）四條路徑。
出街者可以按考慮能力及時間去選擇最合適路線，每款路段都係入山行個圈回到起點，唔夠喉嘅你都可以繼續行去荃灣或者落山往大埔火車站離開。 由於山泥傾瀉影響，最簡單嘅紅路需要2021年年中先會重開，咁就先分享第二簡單嘅藍路 ─ 路徑大致平坦，亦甚少起伏，適合想簡便入深山放鬆心情嘅朋友，風景主要為樹影同雀鳥，符合一家大細亦吸引到唔少鳥類愛好者嘅行山路線。
由大埔墟廣福道出發，坐28k / 73A / 72 / 74A 等交通工具到「松仔園」站落車，過馬路到對面就係大埔滘公園。題外話，大埔滘公園有塊由大埔七約鄉公所所立嘅石碑，紀錄一段1955年山洪暴發引致二十八人罹難嘅慘劇。
行入少少就係大埔滘自然護理區嘅入口，沿斜路上斜，會先經過大埔滘自然教育徑入口，係夏天時份睇螢火蟲嘅好地方，但唔好入去，繼續向前行到大埔滘林徑入口，即四條林徑嘅起步點。
藍路主要為平坦泥石路，起伏唔多，沿途將會有路牌帶住你行所以唔需要擔心。由起點沿住河慢慢行，中間會有公園地方可以野餐，附帶有小型滑梯俾小朋友放電。
中段會見到臨時洗手間，就係一個分岔口，向上斜路行係往荃灣，向下行係往大埔墟火車站，如果只想圍繞園林行一圈，可以跟隨指示牌到野外研習園接回起點，馬路旁邊就係各種交通工具，返大埔定出九龍都好方便。全長大約2個鐘左右，慢慢深入大自然，係差少少風景睇，但整體係一個好唔錯嘅消閒活動。
TripGuide 去後感
雖然係平日，但一路行都遇到唔少人，有帶寵物散步嘅，亦有影雀仔嘅，亦有同小朋友慢慢行嘅。
由於路徑元素多，每個人都可以搵到自己想要嘅。但提提大家，由於路線起點有馬嬲和流浪狗出沒，而且好惡，所以食物就盡量唔好係前段攞出嚟，好似我都係喺大埔滘花園食完就出發，咁就免卻好多麻煩。
地圖
仲有邊度好去？
