荃灣另類親子消閒地 - 三棟屋博物館

三棟屋博物館喺1987重建嘅時候保留咗建築嘅中軸以及三個廳，因為每個廳都有一條主樑為棟承重，所以被稱為三棟屋。三棟屋博物館面積約2,000平方米，成一個長方型，由前門入去，右手邊係三棟屋歷史展館，而左手邊係香港非物質文化遺產嘅展覽廳，由入口佈局就知道「歷史」與「傳承」就係博物館嘅主題。

身為一條有二百幾年歷史嘅客家圍村，內藏嘅歷史背景當然唔少啦。由前廳出發經過屏風，就會到達陳氏祠堂，而圍繞嘅就係四房到長房嘅故居。故居內以當年生活習慣設計，好似有起居，婚嫁用品等等，務求令訪客可以更了解古時居民嘅生活習慣。右邊前巷有「話當年」- 居室．廚房主題，入面除左有舊物展示之外，仲會有工作紙，適合大人小朋友一齊交流，認識更加多。

前廳相連嘅接待室，係香港非物質文化遺產嘅展覽廳。

一入門就有一個十分精緻嘅白蛇傳嘅機動花牌，㩒個制佢就會識郁。

中間有個大電視播放香港傳統技藝人嘅採訪，好似有涼茶、造琴等等。

而喺建築群入面，左右兩旁嘅橫屋成為咗各種非物質文化遺產嘅獨立展示場，好似係有紙紮麒麟、機動花牌，

小朋友都可以藉住展示版嘅內容略知香港文化。