沙田拜神體驗 - 沙田車公廟
- 逗留時間約1小時
- 獨遊/情侶/三五知己
- 豐儉由人
- 沙田車公廟路7號
- 車公廟站落車後步行約10分鐘
關於
最近香港疫症橫行，有唔少人都會去求神問卜，希望得到神明保佑，求個心安。
而其中大名鼎鼎嘅車公自然成為熱門之選，事關大圍車公廟起源都同防疫有關，傳聞古時新界瘟疫橫行，尤其以沙田瀝源最為嚴重，所以古人翻書查經，發現宋朝車大元帥，所到之處，疫症即止，所以喺西貢蠔涌原裝車公廟請車公嚟到沙田保佑村民。
時至今日，車公廟成為世人許願求指引嘅地方，除咗香港人，泰國等東南亞信徒都會特登黎拜訪。
無論你信唔信神都好，TripGuide都希望同你分享吓依個傳統民間習俗嘅參拜流程。
以下有個大約流程講返喺大圍車公廟嘅基本「拜神」步驟：
首先由翠田街足球場旁邊正門入廟，左手邊會見到一個售賣部，入面放左好多唔同種類嘅參拜祭禮同信物組合，如果無自備香燭嘅可以喺度買，價錢豐儉由人，由幾十到上千都有。
套裝嘅話一般都會包3支大香、燈油一對、線香一紮，以及經由車公廟開過光嘅「車公平安卡」，記得袋穩。
當準備好之後就可以跟住以下步驟參拜。
1. 首先走到中間，面向大門口，向天拜三拜
2. 然後轉身，三拜車公，說出名字及心願
3. 喺壇前三個香爐揀一先上大香
4. 然後線香，先到土地公上三支
5. 壇前三個香爐各上三支
6. 留下三支香進入大殿，其餘全部上在大鼎
但如果係過程中唔記得下一步要做咩，就向周圍嘅職員求助，佢地都會好樂意指引住你嘅每一個程序。
入到大殿就先將一對香油交俾職員，之後將手上嘅三支線香插到去大殿香爐同時間可以心中默念同車公要求嘅事。上完香就添香油，如果嗰日善信多，油燈嘅油就會滿，到時就着量加就可以。完成程序後，你仲可以做功德隨緣樂助係簿上寫低要求嘅事同香油錢，職員會俾一封開光利是俾善信，保存好係銀包。
嚟到依度，「拜神」就基本上完成啦，旁邊仲有風車可以轉下運，打鼓求籤等等就按自己需要去參加。
TripGuide去後感
「拜神」依樣野信則有不信則無，並非鼓勵迷信，但作為香港人都好應該去了解下傳統文化係點樣運作。
先講一開始嘅拜神Package，比較多件揀係長壽香($168)同龍香($580)兩個套餐，最大分別就係長香嘅大小，長壽香大約有一米高，而龍香就會長多3分1左右。
其次就係服務，買長壽香嘅話雖然會有職員幫你點着啲香，但成套流程就要自己去做每一步。如果想有位廟祝陪住你由頭到尾，就可以揀係販賣處要求，俾多少少錢，佢替同神明請安同祈福，誠意十足。
一般嚟講，拜完神就要還神，一般人習慣係新精頭初三上頭柱香拜神，並會喺冬至前還神，但依加就無咁死板，只要係一年內還神就可以啦，所以唔想同人逼就可以揀啲唔熱門嘅日子去。
許願內容有人會話最好講詳細啲，比如係「我要賺到一百萬。」但講到底最緊要真誠，詞能達意就OK。
地圖
仲有邊度好去？
