油麻地 - 上海街玉器小販市場新登場

油尖旺區各區體驗
26.11.2020 | 10:51
  • 逗留時間約1小時
  • 獨遊 / 三五知己
  • 免費
  • 油麻地甘肅街

關於

喺80年代,香港玉器貿易需求大,賣玉器嘅攤販大多都聚集係廣東道近西貢街一帶,政府於1984年為咗分流商戶以及管理,喺甘肅街興建玉器市場安置部分玉器商。

35年過去了,為配合中九龍幹線工程,玉器市場都於2020年12月開始清拆,而原本嘅商戶都會搬去旁邊嘅新起大樓 - 上海街玉器市場,雖然外表有變,但內裏情懷未變,配合旁邊嘅廣東道玉器街就可以一探香港玉器業嘅發展歷史。

新上海街玉器市場隆重登場

為配合中九龍幹線發展,甘肅街玉器市場將會清拆,現存嘅商戶喺2020年11月16日開始搬到旁邊嘅上海街玉器市場繼續經營。新嘅玉器市場樓高4米,加強了通風系統, 有6個出入口,將會係12月以全新面貌同大家見面。

甘肅街玉器市場舊貌

甘肅街玉器市場分為東西(A,B)兩面,行家會稱大邊、細邊作分別。中間隔住條炮台街,大邊(A)有較多嘅攤位,而細邊(B)除咗販賣玉器之外,仲有代客寫字、報稅等傳統港式服務。玉器商號都喺用一檔一檔專櫃式嘅間隔,好似一個大市集。

檔與檔中間通道闊偌,而且通風好,幾好行。每一檔都會掛起一串串嘅玉,雖然款式都係大同小異,但放出嚟睇住佢閃閃吓好有味道。玉嘅種類包羅萬有,好似係玉粒、玉佩、吊飾等等,可以由幾十蚊到上千都有,但點樣揀就可能要問吓專家喇。

由於甘肅街玉器市場會喺12月開始清拆,所以現時商戶都開始執拾緊攤檔物資準備搬遷。而新嘅玉器市場就再沒有區分兩邊,代客寫字、報稅等服務就剩下僅餘七檔。

TripGuide去後感

香港現今社會對玉器嘅需求無以往咁殷切,加上疫情關係外國遊客欠奉,所以到訪日市場只得寥寥可數嘅訪客。

雖然市況唔太理想,但攤販嘅熱情未減,就算已表明只係行過睇吓,但亦大方介紹每種玉嘅特性以及價格。本來對玉器一竅不通,喺傾談下發現原來「玉」並唔一定係高價產品,亦有適合整簡單手工藝品嘅廉價玉飾,仲喺唔同成色選擇,配搭出唔同嘅物料就可以擺脫從此嘅老土感。

甘肅街玉器市場將於年尾清拆,並會喺幹線工程完成後喺原址重建,想睇舊香港市集嘅嘅朋友就要快啲去啦。

地圖

油尖旺區仲有咩好玩?