另類鯉魚門 - 賽馬會鯉魚門創意館

觀塘區各區體驗
12.07.2020 | 05:42
  • 逗留時間約1小時 (不包括工作坊)
  • 獨遊/情侶/三五知己
  • 免費
  • 鯉魚門海傍道中45號
  • 乘巴士在鯉魚門巴士總站下車

關於

1946年鯉魚門村村民喺酒灣興建海濱學校,校名寓意為「學海無涯,海濱為始」。學校作育英才62年後,喺2008年正式停辦。直至2010年,九龍社團聯會社會服務基金向政府申請,並由賽馬會資助,將海濱學校校舍翻新成賽馬會鯉魚門創意館。

 

賽馬會鯉魚門創意館以成為東九龍藝術文化平台為目標,目前有舉辦教育、文化、保育、藝術等可持續發展活動,引導訪客介紹鯉魚門歷史。順帶一提,創意館嘅頂樓有間食西餐同精緻糕餅嘅Petit Four,行到攰攰地都可以去hea下。

 

賽馬會鯉魚門創意館開放時間

 

星期一至日 - 上午10時至下午6時,公眾假期休息

Petit Four營業時間:

星期六 & 日 - 中午1時至下午5時半

------------------------------------------------------------------------------------------------------------------------------------

 

 

鯉魚門只有食海鮮?

位於鯉魚門海傍道中段,賽馬會鯉魚門創意館嘅外形猶如一個社區會堂,旁邊有個小花圃同藝術擺設。經過一道窄門行入去,牆上掛滿學校同有份出資建校嘅社會賢達嘅舊相。

 

入到中庭會先留意到一塊塊鯉魚門歷史展版,講述鯉魚門早年以揼石仔起家嘅發跡史,以及當時客家人用到嘅工具及用語。亦有講到隨住香港政府喺1967年唔再為石廠續牌,令打石行業沒落,三家村先轉營賣海鮮。中庭講座室亦係創意館嘅藝術展覽廳,入面有駐館藝術創作者嘅作品,有編織、流畫陶瓷等等。

 

創意館亦會同駐館創作者合作,比如過去就舉行咗「藍染及編織體驗全日工作坊」,以導賞團為引子配合手作活動為遊客提供一個到訪嘅理由。

 

出發前可以睇吓佢地嘅Facebook / Instagram,或者打 2205-8100 了解下有無新活動先出發。

 

 

Chill住食手工蛋糕甜點 Petit four

賽馬會鯉魚門創意館除左向訪客提供歷史知識外,亦會照顧到大家個胃。

喺一樓就有間Cafe - Petit four (係openrice搵唔到架),有手沖咖之外,鎮店之寶有西瓜士多啤梨蛋糕,蛋糕面有士多啤梨,中間夾住整塊西瓜,再加上有少少玫瑰香和杏仁,食落去有唔同層次,好清新!

 

cafe亦會有意粉、多士等簡餐任君選擇。

 

除左喺室內食,外面天台都開放俾大家使用。

注意番cafe只會在星期六日開門,而且蛋糕數量有限,建議預留。WhatsApp:9282 4084,店主都接受訂蛋糕服務!

 

聽講創意館後山喺麻鷹巢穴,喺黃昏時候就會見到群鷹喺天空漫舞,

可以一邊食一邊睇鷹,實屬城市入面難有體驗。

 

Instagram: Petit Four 

TripGuide去後感

測試員係喺平日到訪賽馬會鯉魚門創意館,本身都無做過任何功課,係見到個門口膽粗粗行入去。一入去大堂無開燈,只有掛滿舊相嘅牆,可以睇得出依度本身係間學校,另外仲有個細櫃放啲細公仔商品。行入少少就見到個中庭,可以睇下鯉魚門之前嘅歷史。睇左一陣,有職員出嚟講解吓展版以外嘅資料,以及分享創意館舉辦嘅活動。

 

平日路過嘅話係可以入去睇下歷史,但更加建議喺週末假日去,又或者先喺佢地嘅社交平台確認過會有活動嘅日子再去,咁樣個體驗會更加好。

 

一樓Cafe嘅環境十分好,行文青風。用餐地方有室內外選擇,但戶外平台無瓦遮頭,所以如果夏天嘅話會有啲熱。相比起只係買手信、食海鮮等等基本行程,賽馬會鯉魚門創意館可以提供更加有深度嘅行程俾你選擇,都算係一個唔錯嘅地方。

地圖

觀塘區仲有咩好玩?

觀塘食海鮮 - 輕鬆遊鯉魚

(0)

1238 位瀏覽過