離島一日遊- 香港威尼斯 -大澳

離島區戶外活動
26.04.2020 | 07:39
  • 逗留時間約6小時
  • 任何人
  • 自費活動
  • 東涌地鐵站 B 出口露天巴士站 (360纜車旁) / 坐大澳專線11號於梅窩碼頭乘坐大澳專線6號

關於

每次同朋友講放假去大澳玩,總係會比人問大澳有咩玩?去大澳做咩? !

一般嚟到大澳,或會選擇出海睇海豚,係大澳買下茶果,食下大魚蛋,影下相或者搵間民宿租一個晚上,係走之前就一定會幫親戚朋友啊媽買蝦醬海味番屋企。

除左以上之外,其實仲有其他大澳知識,唔知你又知唔知?!

其實大澳係一個好有人情味嘅地方,2018年「山竹」襲港,位於低窪地區的大澳,每間屋都水浸過大脾,好彩有熱心人士幫忙,喺風雨中照顧長者,並喺一星期後恢復元氣。2020年頭,1.3億頭獎六合彩,有被訪問人士稱自己係大澳人,話如果中左頭獎,會捐比大澳老街坊。

大澳非茂里

由於太早關係(早上十點半),人流除左街坊之外,遊客嘅唔係話好多,有D舖頭就準備開門或者未開。Tripguide行下行下見到一間舖頭門口有幾隻貓,不禁地被吸引住,而門口就寫住大澳非茂里,但原來入面係貓貓café ,。於是就入去坐低,叫左杯野飲同貓貓玩。後來同cafe員工寒暄幾句,發現『大澳非茂里』係由3位茂里組成嘅民間組織,成立於2018年6月,主要將大澳加以推廣及保育,將文化變為產業。而開貓貓café嘅目的係讓貓貓唔再係流浪貓,應該係屬於大澳一分子,提供好一個棲所比佢地,更加係3位茂里嘅聚腳點

 

其中一位茂里係土生土長、熱愛大澳嘅大澳人,一位係因為抽到大澳居屋而開始喜歡大澳,另外一位係由市區搬入黎嘅藝術創作人。三條茂里都因為鍾意大澳人同物及對大澳有著共同夢想,希望為呢個僅存嘅漁村水鄉,舉行唔同延續文化和經濟活動。令大澳最簡樸最有人情味的舊香港情懷同有緣人分享。2019年開始舉辦歌曲表演文化市集、水鄉花燈亮燈晚會,壁畫美化等活動。

 

而大澳非茂里定期會舉辦大澳導賞,義工招募,幫助大澳公公婆婆,例如剪頭髮,大掃除等

有興趣嘅您可以同茂里們聯絡,如果你去貓貓café,可以同員工傾下計,會知道大澳多一點!

發現大澳

眾所周知,大澳由幾條出名嘅街道,永安街、太平街、吉慶街、石仔埗,係一個漁村水鄉,有棚屋,食茶果嘅地方,而以下係出街想同你分享嘅野

 

沙翁:除左茶果之外,大澳沙翁都好出名,佢會係你面前即叫即炸,每次老闆娘會炸10幾個,唔夠再整,門口會見到有人排隊等候新鮮出爐,同平時面包店沙翁唔同,食落去熱辣辣,甜度適中。

地址:大澳餅店 - 吉慶街66號

大澳文物酒店:想係大澳留一個晚上,又唔想住棚屋的話,可以考慮大澳文物酒店,酒店有9間客房,及每日3點至4點半有導賞團,同你講下大澳昔日的故事。如過唔想過一晚的話,酒店都設有餐廳,可以同朋友望住海景傾計,食下HIGH TEA!

地址:大澳石仔埗街14號

太平車:大澳有70%居民都係老人家為主,所以早幾年有間NGO推出『太平車服務』,於唔同街道放置輪椅,讓行動不便人仕可使用太平車在大澳出入,例如睇醫生或參加社區活動。每個太平車箱都色彩繽紛,打開入面有一台輪椅。居民每次用完都會放番原位,珍惜太平車!

碼頭:大澳碼頭設有售票亭出售往東涌 / 屯門的渡輪,如果離開嘅時候想嘗試搭船離開,記得盡出買票。而渡輪比專線巴士快10分鐘出到東涌

曬蝦醬/蛋黃棚屋區會有見到一個個鮮艷鹹蛋黃、一桶桶蝦醬,風味十足!由於小編出發前無做足準備,當天係沒有學曬鹹蛋黃工作坊,如果想學的話,可以留意女青大澳文化生態綜合資源中心 https://www.facebook.com/ywcacerc/報名參加啦!

 

 

大澳棚屋

大澳有一排排於水上搭建嘅棚屋,亦係居民的住所。棚屋區由橋和水上木板走廊連接在一起, 縱橫交錯嘅棚屋係大澳嘅特色。大澳有兩條主要嘅大橋, 其中一條係棚屋區入面嘅開合橋 。

約三十年前, 棚屋漁民需要自己解決棚屋區內嘅出入問題, 於是就自資起了這條新基橋。例如當需要搬運大型嘅物品, 例如木材, 就有需要把橋合埋,讓木材通過。而棚屋嘅主要建材係『坤甸木』, 遇水後會變得愈強,插入水中支橕棚屋重量。 

小小歷史知道:大澳棚屋居民係古代越族後人, 亦俗稱為水上人家, 係香港最早定居人士。

Tripguide 去後感

1. 今次出街既最大感想係知道大澳有一班為大澳保留價值及宣揚大澳嘅茂里, 佢地曾經係九月中秋時份舉行過花燈會, 相信係漁村佈滿花燈一定好靚。有機會的話,小編都想去大澳過一個唔同嘅中秋節。

 

2. 其次感想就係原來大澳有曬蝦醬/整蛋黃嘅工作坊可以參加, 呢類型嘅工作坊係市區出面唔會見到有。Tripguide建議出發前可留意上面facebook page睇下有無相類工作坊或活動參加,讓您嘅出街之旅增添樂趣。

 

3. 食過午飯後, 我地走到去大澳另一邊, 去參觀文物酒店。由大澳大街行去文物酒店距離有點遠, 可能開始攰同埋有猛烈陽光照住。好彩係係酒店餐廳門外有幾張凳陰陰地有得坐下, 如果唔係真係會中暑😰。

 

4. 測試員搭專線出番東涌時,見到路上有交通警設Roadblock, 原來車輛要進入大嶼山範圍是要申請禁區紙,相關資料可留意運輸處網頁https://www.td.gov.hk/tc/public_services/licences_and_permits/lantau_closed_road_permit/index.html

 揸車朋友要留意一下,自己揸車還是坐專線巴士。切勿博大霧闖禁區,有機會收告票架~~~~

 

最後,珍惜漁村愛護地球, 不要破壞環境, 減少製造垃圾

地圖

仲有邊度好去?

離島區仲有咩好玩?