灣仔文化保育 - 藍屋建築群

灣仔區各區體驗
03.05.2020 | 03:01
  • 逗留時間約2小時
  • 三五知己/情侶/家庭
  • 免費
  • 灣仔石水渠街72A 號街 4 號 (開放時間:10:00–18:00)
  • 港島線灣仔站A3出口,步行約3分鐘

關於

灣仔藍屋於1922年重建時,由於物業業權分別由政府及私人擁有。政府將其部分在修葺的時做髹上藍色,「藍屋」因此得名,而私人業權部分就仍然係灰色外牆。藍屋與相連嘅「黃屋」及「橙屋」合稱藍屋建築群,藍屋在2000年被古物古蹟辦事處評為「一級歷史建築物」而黃屋則為「二級歷史建築物」。黃屋橙屋藍屋性質一樣都係住人嘅地方分別在於,間隔 藍屋最先起,入面住嘅都係基層較多,一屋間開比好多房人住,橙屋之前做過倉庫,依加都係住人;黃屋 就係比較有錢嘅人住,樓底高啲間隔就靚啲。在2012年,立法會通過撥款港幣7,540萬元啟動「We嘩藍屋」(Viva Blue House)藍屋建築群活化項目,該項目在2017年獲聯合國頒發亞太區文化遺產保育保護獎最高榮譽的卓越大獎。「We嘩藍屋」係一個做到「留人又留樓」嘅保育方式,同時推行由社區主導、鼓勵街坊互助嘅「好鄰居計劃」。如果你自問可以對藍屋社區帶黎貢獻,你都可以申請依個計劃租間嚟住,經過面試後成為一分子。

遊覽攻略

當你圍繞藍屋建築群行一個圈,會發現一般公眾可以進入嘅地方係以下5個,

香港故事館:前半部分係一個類似接待處嘅地方,會定期舉行活動,好似TripGuide去嘅當日就有廢物重用嘅「紙包轉轉轉,風車工作坊」。後半部分就係一個紀錄左藍屋居民故事同展品嘅空間,可以從中了解到藍屋嘅歷史。

時間關係 & 本地薑:兩間都係餐廳,前者提供健康中西及亞洲Fusion菜式,後者就有低碳環保健康素食。

土作坊:售賣特色環保產品及本地有機蔬菜。

時分天地【社區公所】:採用鄉公所嘅概念,係藍屋社區建立佢自己嘅公所。時分天地成為左當地居民聚腳,以物易物,互相交流嘅地方。

以上嘅地方,如果不消費、無準備、只係影幾張打卡相嘅話,大約30分鐘就行得曬。

必去導賞

但若果你想了解多啲藍屋又有大約 1個鐘嘅時間又嘅話,TripGuide係極之推薦大家去參加藍屋導賞團 每日都會有團,分別係早上11點同下午3點,出團前係香港故事館報名就得。但要留意,要有3人以上先會上樓,如果唔係就會只喺樓下周圍行。而如果你只得一個人的話,可以先喺網站上面預約,好讓藍屋方面安排人手。

力推嘅原因係除左導賞係免費嘅之外,導賞員富有知識同帶得生動有趣亦係主因。

導賞會先由門口嘅大水渠街講起當時街坊文化,藍屋外觀,樓下商鋪歷史再到「藍屋」+「黃屋」+「橙屋」組成嘅藍屋建築群現在社區「好鄰居計劃」嘅運作模式,由古至今。介紹完地面有嘅野之後就係重頭戲,上樓。為保持神秘感,上面嘅導賞內容細節就唔詳細講,留返比你地自己去發掘。只能講,感覺係上左別開新面嘅香港歷史堂。

最後落返黎係香港故事館解散,建議再圍住藍屋群行多個圈,又會有新嘅感受。

TripGuide去後感

1. 為左模擬大家可能會面對嘅情景,當日去嘅時候係 0 準備,如果唔係剛好有風車整同撞正導賞出團,大概我就會覺得依個地方無咩特別。所以想要最基本嘅體驗,建議揀係 11 & 3 導賞開團嘅時間去,咁樣個行程先會夠豐富,當日嘅導賞員係一位退休老師,我估係有參與過藍屋復修嘅工作,所以資訊性好高,基本上問咩都識答。

「藍屋係藍色所以叫藍色,但橙色同黃色嘅嗰兩棟又唔係橙色同黃屋啵。」

「之前住藍屋嘅係比較草根嘅人,而住黃屋嘅就有錢啲。」等等嘅冷知識都喺過程中不斷滲出黎。

2. 對比起其他所謂嘅「活化」項目,藍屋建築群更加能夠體現出活用歷史達至公眾教育之類又能夠產出經濟價值。最後,可以嘅話就支持下樓下嘅餐廳商鋪,因為咁樣等同支持緊成個計劃,如果蝕錢,個計劃可能就會玩完。

如果想知道藍屋嚟緊最新嘅公眾活動,可以即上 藍屋活動日程表 了解更多,比如2020年第一個活動就係整迷你花牌。

3. 提醒:藍屋係有居民住緊,所以遊覽嘅時間請保持安靜,互相尊重,仲有舊屋入面影到嘅相唔能發佈到社交媒體。

參考資料:官方網址Facebook

灣仔區仲有咩好玩?